Rusiya Xarici İşlər naziri Sergey Lavrov Moskvada akkreditə olunmuş BRICS üzv dövlətlərinin və tərəfdaş ölkələrin səfirləri ilə görüşüb. 

Postxronika.az TASS-a istinadən xəbər verir ki, görüş zamanı assosiasiya daxilində strateji tərəfdaşlığın gücləndirilməsi məsələləri diqqət mərkəzində olub.

Hindistanın sədrliyi və qlobal gündəm

Nazirlikdən verilən məlumata görə, işçi nahar formatında keçirilən görüşdə tərəflər Hindistanın bu il BRICS-ə sədrliyi çərçivəsində irəli sürdüyü prioritetləri müzakirə ediblər.

Görüşdə həmçinin qlobal gündəlikdə duran aktual məsələlərə toxunulub. Xüsusilə, Birləşmiş Millətlər Təşkilatının mərkəzi rolunun sarsıdılmasının yolverilməz olduğu vurğulanıb.

Qlobal idarəetmədə yeni hədəflər

Tərəflər qlobal qərarların qəbulunda "dünya çoxluğu" ölkələrinin rolunu artırmaq üçün qlobal idarəetmə sisteminin təkmilləşdirilməsi istiqamətində birgə səylərin vacibliyini qeyd ediblər. Həmçinin, BRICS-in beynəlxalq nüfuzunun artırılması və əsas çoxtərəfli platformalarda iştirakçıların koordinasiyasının gücləndirilməsinə sadiqlik ifadə olunub.