Həftəsonu günlərində paytaxtdan regionlara və şəhərlərarası yollarda nəqliyyatın hərəkət intensivliyi əhəmiyyətli dərəcədə artır. Bu cür sıxlıq şəraitində sürücülərin üzərinə daha böyük məsuliyyət düşür.
Məsələ ilə bağlı Daxili İşlər Nazirliyinin (DİN) Mətbuat Xidməti yola çıxmağa hazırlaşan sürücülərə müraciət edərək vacib qaydaları xatırladıb.
Müraciətdə qəzaların qarşısını almaq və hərəkət iştirakçılarının təhlükəsizliyini təmin etmək üçün aşağıdakı tələblərə əməl olunması xahiş edilir:
• Texniki baxış: Səfərə başlamazdan öncə avtomobilin əyləc, sükan, təkər və işıqlandırma sistemlərinin tam saz vəziyyətdə olduğuna mütləq əmin olun;
• Sürət rejimi: Hərəkət sürətini təkcə müəyyən edilmiş hədlərə deyil, həm də mövcud yol və hava şəraitinə tam uyğunlaşdırın;
• Fasilə: Uzun məsafəli səfərlər zamanı yorğunluq və ya yuxululuq hiss etdiyiniz an avtomobili təhlükəsiz yerdə saxlayaraq mütləq istirahət edin;
• Məsafə və ötmə: Öndə gedən nəqliyyat vasitəsi ilə lazımi ara məsafəsini qoruyun, ötmə manevrlərini isə yalnız icazə verilən və təhlükəsizliyin tam təmin edildiyi ərazilərdə həyata keçirin.
DİN Mətbuat Xidməti eyni zamanda vurğulayır ki, sükan arxasında olarkən diqqəti yayındıran vasitələrdən, xüsusilə mobil telefondan istifadədən qəti şəkildə çəkinmək lazımdır. Bütün sərnişinlərin və sürücünün təhlükəsizlik kəmərini bağlaması isə həyati əhəmiyyət daşıyır.
Sonda bir daha xatırladılır ki, səfərin rahat və təhlükəsiz yekunlaşması bilavasitə sürücünün yollardakı intizamından, qaydalara necə əməl etməsindən asılıdır.