"BAFTA'' mükafatlı rejissor Linn Remsi builki ''Glasgow Film Festival'' çərçivəsində ''Cinema City'' fəxri mükafatı ilə təltif olunacaq. Təqdimat martın 6-da keçiriləcək xüsusi “From Page to Pulse” adlı müzakirə tədbiri zamanı baş tutacaq və görüşü rejissor Adura Onaşil aparacaq. Sənətçinin adaptasiya yaradıcılığına dair yanaşması geniş şəkildə müzakirə olunacaq. Remsi bədii film debütünü 1999-cu ildə çəkdiyi ''Ratcatcher'' ilə edib və bu ekran işi ona ''BAFTA''da “ən yaxşı debüt” mükafatını qazandırıb. O, sonrakı illərdə ''We Need to Talk About Kevin'' və ''You Were Never Really Here'' kimi psixoloji dramlarla da beynəlxalq nüfuz qazanıb. Festival rəhbərliyi rejissorun kino dilinə təsirini müasir müəllif kinosunun mühüm istiqamətlərindən biri kimi dəyərləndirir.

Postxronika.az xəbər verir ki, 2024-cü ildə təsis olunan bu fəxri mükafat kinematoqrafiyaya mühüm töhfə vermiş yaradıcı şəxslərə təqdim olunur. Mükafatın adı Qlazqonun XX əsrin əvvəllərində Böyük Britaniyada ən çox kinoteatra malik şəhərlərdən biri olması ilə bağlı “Cinema City” kimi tanınmasından qaynaqlanır. Əvvəlki laureatlar arasında Viqqo Mortensen və Ceyms MekEvoy da yer alıb. Festival proqramında sənaye nümayəndələri və tanınmış kino xadimlərinin iştirakı ilə müxtəlif təqdimatlar da planlaşdırılıb. Tədbirin 22-ci buraxılışı fevralın 25-dən martın 8-dək davam edəcək. Təşkilatçılar bildirir ki, builki proqram müasir müəllif kinosunun inkişaf istiqamətlərini ön plana çıxarmağı hədəfləyir.