Franşizanın yeni hissəsi tənqidçilərdən gözləniləndən daha sərt reaksiyalar alıb. Film hazırda ''Rotten Tomatoes platformasında cəmi 42 faiz müsbət rəy toplayaraq seriyanın ən zəif nəticəsi kimi qiymətləndirilir. Layihədə Neve Campbell yenidən Sidney Prescott obrazına qayıdır, rejissor kürsüsündə isə ilk dəfə olaraq seriyanın yaradıcısı Kevin Williamson əyləşib. Yeni nəticə əvvəlki zəif rekord sayılan ''Scream 3'' filmindən də aşağıdır. Tənqidlərin bir hissəsi ssenarinin təkrarçılıqdan uzaqlaşa bilmədiyini və qorxu səhnələrinin əvvəlki hissələrin təsirini yaratmadığını vurğulayır. Bununla yanaşı, bəzi rəylər layihəni əyləncəli və enerjili davam filmi kimi qiymətləndirərək müsbət yanaşma nümayiş etdirib.

Postxronika.az xəbər verir ki, film ətrafında yayılan rəylər kəskin şəkildə bölünüb və bəzi nəşrlər onu seriyanın ən uğursuz işi adlandırıb. Digər tənqidçilər isə layihənin əvvəlki hissələrin ruhuna qayıtdığını və əsas qəhrəmanın hekayəsini davam etdirmək baxımından maraqlı olduğunu bildirirlər. Süjet Sidneyin sakit həyat qurduğu şəhərdə yeni ''Ghostface'' qatilinin ortaya çıxması ilə başlayır və bu dəfə hədəfə onun ailəsi düşür. Qəhrəman keçmiş kabusları ilə yenidən üzləşərək qanlı hadisələri dayandırmağa çalışır. Rəylər qarışıq olsa da, filmə kommersiya baxımından güclü start proqnozlaşdırılır. Analitiklər layihənin qlobal kinobazarda yüksək gəlir əldə edə biləcəyini istisna etmirlər. Beləliklə, ekran işi həm sərt tənqidlər, həm də kommersiya gözləntiləri ilə gündəmdə qalmaqda davam edir.