Alman rejissor Jens Schanzenin yeni sənədli filmi ''Materia Prima'' dünyada artan litium tələbatını və bu xammal ətrafında yaranan qlobal rəqabəti araşdırır. Film elektrik enerjisi saxlama sistemləri, məlumat mərkəzləri, elektromobillər və smartfonların istehsalında mühüm rol oynayan litiumun strateji əhəmiyyətinə diqqət çəkir.

Postxronika.az xəbər verir ki, sənədli film Boliviyada yerləşən böyük litium ehtiyatları fonunda qlobal maraqlar ilə yerli icmaların həyatının necə toqquşduğunu göstərir. Süjetdə Avropa ölkələrinin avtomobil sənayesini qorumaq üçün xammala ehtiyacı, Boliviyanın isə bu resursdan yoxsulluqla mübarizə vasitəsi kimi istifadə etmək istəyi ön plana çıxarılır. Film həmçinin müasir litium siyasətini kolonializm tarixinin uzunmüddətli təsirləri ilə müqayisə edir. Layihədə hökumət strukturları, beynəlxalq şirkətlər və əsasən qadınların təşkil etdiyi vətəndaş cəmiyyəti qruplarının mövqeləri təqdim olunur.

Ekran işi müxtəlif baxış bucaqları vasitəsilə qlobal enerji planlarının yerli insanların gündəlik həyatına necə təsir etdiyini nümayiş etdirir. Rejissor bildirir ki, film üzərində altı ilə yaxın davam edən istehsal prosesi ərzində Boliviyada geniş əlaqələr qurmaq və bütün tərəflərə çıxış əldə etmək mümkün olub. Layihədə kənd icmaları, Avropa İttifaqı diplomatları, sahibkarlar və Boliviya hökumətinin nümayəndələri ilə aparılan müşahidələr əksini tapır. Sənədli film eyni zamanda təbii sərvətlər uğrunda mübarizənin tarixi köklərinin bu gün də qlobal siyasətdə hiss olunduğunu göstərməyə çalışır.