Bakının Sabunçu və Suraxanı rayonlarında müxtəlif ünvanlardan dəyəri minlərlə manatla ölçülən əmlakı talayan şəxslər ələ keçib. Hər iki fakt üzrə polis əməkdaşları tərəfindən müvafiq əməliyyat-axtarış tədbirləri görülüb.
Postxronika.az xəbər verir ki, paytaxt ərazisində qeydə alınan oğurluq hadisələrinin təfərrüatları məlum olub:
Sabunçu rayonu üzrə: Ərazidəki binaların birinə daxil olan naməlum şəxs oradan ümumi dəyəri 2200 manat olan kombi aparatı, akkumulyator, su sayğacı, mühərrik və naqil oğurlayıb. Həyata keçirilən tədbirlərlə əməli törətməkdə şübhəli bilinən 40 yaşlı S.Muradov müəyyən edilərək saxlanılıb. Araşdırma zamanı onun taladığı əşyaları metal qəbulu məntəqəsinə satdığı sübuta yetirilib.
Suraxanı rayonu üzrə: Rayon ərazisindəki obyektlərin birindən 2350 manat dəyərində mis borular oğurlanıb. Keçirilən əməliyyat nəticəsində bu əməldə şübhəli bilinən 29 yaşlı C.Məmmədov da polis əməkdaşları tərəfindən müəyyən edilərək tutulub.
Hazırda hər iki faktla bağlı hüquq-mühafizə orqanları tərəfindən araşdırmalar davam etdirilir.