Vaşinqton və Tehran arasında potensial danışıqlarla bağlı fərqli məlumatların yayılmasından sonra "Brent" markalı neftin bir barelinin qiyməti Asiya bazarlarında yenidən 100 dollar həddini keçib.

Postxronika.az xəbər verir ki, Ağ Ev rəhbəri Donald Trampın planlaşdırılan hərbi zərbələri təxirə salması və tərəflərin məhsuldar dialoq aparması barədə açıqlaması qara qızılın kəskin ucuzlaşmasına səbəb olsa da, İslam Respublikası bu iddiaları qətiyyətlə rədd edib. Fevralın 28-də başlayan münaqişə fonunda qlobal enerji daşıyıcılarının təxminən 20 faizinin keçdiyi Hörmüz boğazının faktiki olaraq bağlanması dünya bazarlarında ciddi qeyri-sabitlik yaradıb. Bununla belə, hərbi əməliyyatların müvəqqəti dayandırılması xəbərlərindən sonra əsasən Asiyanın fond birjalarında, o cümlədən Yaponiya və Cənubi Koreya indekslərində nisbi sabitlik müşahidə olunmağa başlayıb. Yaranmış təchizat problemini qismən aradan qaldırmaq məqsədilə Birləşmiş Ştatlar dənizdəki Rusiya və İran xammalına tətbiq edilən sanksiyaları müvəqqəti ləğv etməyə qərar verib. Eyni zamanda, Çin rəhbərliyi müharibənin gətirdiyi iqtisadi yükü azaltmaq üçün ölkə daxilində sürücülər üçün nəzərdə tutulan yanacaq qiymətlərinin artırılması planını dayandırıb.