Əfsanəvi döyüş ustası və aktyor Çak Norrisin ailəsi ulduzun vəfatından sonra internetdə yayılan dezinformasiyalara görə kəskin bəyanat yayıb. 86 yaşlı sənətçi ötən ay Havay adalarında qəfil dünyasını dəyişib. Hazırda sosial şəbəkələrdə aktyorun ölümü ilə bağlı süni intellekt tərəfindən yaradılmış saxta görüntülər tirajlanır. Yaxınları pərəstişkarları bu cür aldadıcı paylaşımlara inanmamağa çağırır.

Postxronika.az xəbər verir ki, ailənin rəsmi "Instagram" səhifəsində paylaşılan müraciətdə AI texnologiyası ilə hazırlanan videoların həqiqəti əks etdirmədiyi vurğulanıb. Xüsusilə, Norrisin dəfn mərasimində Silvestr Stallone və Arnold Şvartsenegger kimi ulduzların iştirakını göstərən saxta fotolar ciddi narazılıq doğurub. Bəyanatda qeyd olunur ki, aktyorun sağlamlıq keçmişi və ailə münasibətləri barədə uydurulan məlumatlar tamamilə əsassızdır. Mərhumun doğmaları yalnız rəsmi nümayəndələr tərəfindən təsdiqlənmiş mənbələrə etibar etməyi xahiş edirlər.

Qeyd edək ki, "Texas Ranger" serialı ilə dünyada şöhrət qazanan ulduz son anlarını ailəsinin əhatəsində dinc şəraitdə keçirib. Onun vəfatı kino aləmində böyük itki kimi qiymətləndirilir və milyonlarla pərəstişkar tərəfindən kədərlə qarşılanır. Sənətçidən geriyə həyat yoldaşı Cinya və beş övladı qalıb. Ailə üzvləri bu çətin günlərdə göstərilən mənəvi dəstəyə görə hər kəsə minnətdarlıqlarını bildiriblər.