Pop kralı Maykl Ceksonun həyatından bəhs edən "Michael" biopik filmi dünya premyerasından sonra tənqidçilərin sərt reaksiyası ilə qarşılaşıb. Antuan Fukuanın rejissorluq etdiyi ekran işi sənətçinin uşaqlıq illərindən başlayaraq şöhrət zirvəsinə yüksəlməsini və 2009-cu ildəki vəfatına qədər olan dövrü əhatə edir. Baş rolda Mayklın qardaşı oğlu Cafar Ceksonun çıxış etdiyi film musiqi səhnələrinə görə bəyənilsə də, bütövlükdə ziddiyyətli rəylər alıb.

Postxronika.az xəbər verir ki, ekran əsəri hazırda "Rotten Tomatoes" platformasında cəmi 31 faizlik aşağı reytinqə malikdir. Bir çox ekspertlər bu layihəni sənətçinin adını təmizə çıxarmaq cəhdi adlandıraraq ağır ittihamların və asılılıq mövzularının kənarda qaldığını vurğulayırlar. Məsələn, "The Guardian" nəşri filmi sənətçinin məruz qaldığı travmaları və sonrakı qalmaqalları görməzdən gəlməkdə ittiham edib. Bununla belə, tənqidçilərin əksəriyyəti Cafarin ifasını və rəqs hərəkətlərini "mükəmməl təqlid" kimi qiymətləndirərək yüksək səviyyədə qəbul ediblər. Dramda həmçinin Mayls Teller, Kolman Dominqo və Nia Lonq kimi tanınmış ulduzlar rol alıblar.

Sənətçinin qızı Paris Cekson ssenarinin dürüst olmadığını əsas gətirərək premyerada iştirak etməyib və yaradıcı heyəti boykot edib. Digər tərəfdən, ailənin bəzi üzvləri ekran işinin doğruluğunu müdafiə edərək baş rol ifaçısının Mayklın ruhunu tam canlandırdığını bildiriblər. İzləyicilər üçün musiqili şou xarakteri daşıyan bu əsər sənət və şəxsiyyət ayrımı mövzusunda yenidən böyük müzakirələr doğurub. Filmin yaxın günlərdə geniş auditoriyaya təqdim edilməsi gözlənilir.