Dünyanın ən böyük operator sənəti festivalı olan "Camerimage" rebrendinq edərək rəsmi adını dəyişib. Polşanın Torun şəhərində keçirilən tədbir bundan sonra "ToruńCamerimage" adlanacaq. Bu qərar sənət hadisəsinin 35 il öncə əsası qoyulduğu məkanla strateji tərəfdaşlıq əlaqələrini daha da möhkəmləndirir.

Postxronika.az xəbər verir ki, yeni ad festivalın Kann və Berlin kimi qlobal tədbirlərin nümunəsinə uyğun olaraq ev sahibi şəhərlə eyniləşməsi məqsədini daşıyır. Layihə yerli ekosistemin inkişafına təkan verməklə yanaşı, turizm və xidmət sektoruna da böyük iqtisadi mənfəət gətirir. Ötən ilin nəticələrinə əsasən, müsabiqənin baş mükafatı olan "Qızıl Qurbağa"ya "Late Shift" filmi ilə Yudit Kaufmann layiq görülüb. Digər pillələrdə isə müvafiq olaraq Fabian Qamper və Mixail Sobosinski qərarlaşıblar.

Hazırda Torunda festivalın daimi evi və mədəniyyət qovşağı olacaq Avropa Film Mərkəzi inşa edilir. Təşkilatçılar bu təkamülü vizual hekayəçilik dili ətrafında yeni beynəlxalq dialoq mərkəzinin yaradılması kimi qiymətləndirirlər. Sayca 34-cü olacaq növbəti festivalın bu ilin 7-14 noyabr tarixlərində baş tutması planlaşdırılır.