Kann şəhərində 79-cu Beynəlxalq Film Festivalının təntənəli açılış mərasimi keçirilib. Tədbirin ən yadda qalan məqamı dünyaşöhrətli rejissor Piter Ceksonun "Palme d'Or'' ilə təltif edilməsi olub. Təltifi ona "The Lord of The Rings" saqasında Frodo obrazını canlandıran aktyor Elayca Vud təqdim edib. Tanınmış sənətçi çıxışında rejissorun kino sənətinə verdiyi töhfələrdən və onun karyerasındakı mühüm rolundan bəhs edib.

Postxronika.az xəbər verir ki, Cekson 1987-ci ildə bu festivala "Bad Taste" filmi ilə gəlişini xatırlayaraq yaradıcılıq yolunun məhz burada başladığını vurğulayıb. O, həmçinin ''Warner Bros.'' studiyasının satışı fonunda vaxtilə çəkdiyi çətinlikləri zarafatla qeyd edərək tarixin təkrarlandığına eyham vurub. Mərasimdə rejissorun "Beatles" haqqındakı sənədli layihəsinə həsr olunmuş rəngarəng musiqili performanslar nümayiş etdirilib. Daha sonra Ceyn Fonda və Qonq Li səhnəyə çıxaraq kinonun birləşdirici gücü və müqavimət ruhu barədə çıxış ediblər.

Festivalın rəsmi açılış filmi rejissor Pyer Salvadorinin 1920-ci illər Parisindən bəhs edən "La Venus Eleqtrique" dramı olub. İlin bu nüfuzlu kino marafonunda 140 ölkədən 40 mindən çox peşəkar iştirak edir. Müsabiqə proqramında Adam Drayver və Skarlet Yohansson kimi ulduzların yeni ekran işləri izləyicilərə təqdim olunacaq. Möhtəşəm tədbir rejissorlar və sənətsevərlər arasında geniş dialoq platforması kimi fəaliyyətini davam etdirir.