Vens bildirib ki, İran rəsmiləri ilə danışıqlar müharibəyə son qoyacaq razılaşma üçün yaxşı zəmin yaratdı.

Postxronika.az Associated Press agentliyinə istinadla xəbər verir ki, ABŞ-ın vitse-prezidenti JD Vens bazar ertəsi bildirib ki, İsveçrədə İranın yüksək vəzifəli rəsmiləri ilə keçirdiyi uzunmüddətli danışıqlar ABŞ və İsrailin fevralın sonunda başladığı müharibəyə daimi son qoyulması istiqamətində uğurlu yekun razılaşma üçün “yaxşı zəmin” yaradıb.

İran parlamentinin sədri Məhəmməd Baqir Qalibafla keçirilən ilkin görüşdən sonra jurnalistlərə danışan Vens bildirib: “Yekun razılaşma evdir. Biz onun təməlini qoyduq. Hələ evi tikməmişik, lakin Amerika xalqı üçün yaxşı nəticəyə aparacaq uğurlu bir təməl yaratmışıq”.

İran tərəfi Livanda döyüşlərin dayandırılması istiqamətində “əhəmiyyətli irəliləyiş” əldə olunduğunu qeyd edib və bunu danışıqların ilk real sınağı adlandırıb.

Vasitəçilərin sözlərinə görə, bazar günü başlayan və bazar ertəsinin ilk saatlarınadək davam edən İsveçrə danışıqları zamanı bəzi çətin məqamlar yaşansa da, tərəflər müəyyən razılaşmalar əldə ediblər. Texniki danışıqların bu həftə ərzində davam etdiriləcəyi bildirilib.