ABŞ-də miqrant saxlama məntəqəsində atışma törədən şəxs 10 il müddətinə həbs edildi

ABŞ-nin Texas ştatında yerləşən "Prairieland" miqrant saxlama məntəqəsinin yaxınlığında atışma törətməkdə və federal agentlərə hücum etməkdə təqsirli bilinən şəxsə qarşı məhkəmə hökmü çıxarılıb.

Postxronika.az xəbər verir ki, məhkəmənin qərarı ilə hadisəni törədən Benjamin Sonq adlı şəxs 10 il (120 ay) müddətinə azadlıqdan məhrum edilib.

İstintaq materiallarına görə, hadisə nəticəsində saxlama məntəqəsinin ərazisində təhlükəsizlik qaydaları ciddi şəkildə pozulub və federal orqanların əməkdaşlarının həyatı birbaşa təhlükə altına düşüb. Hüquq-mühafizə orqanları dərhal hərəkətə keçərək şübhəlini hadisə yerində tərksilah edib və nəzarətə götürüblər.

Məhkəmə prosesində çıxış edən prokurorlar bu addımın dövlət orqanlarına və təhlükəsizlik əməkdaşlarına qarşı açıq bir təhdid olduğunu vurğulayıblar. Hakim hadisənin ciddiliyini və törədilən əməlin cəmiyyət üçün yaratdığı təhlükəni nəzərə alaraq qəti hökmünü elan edib.