İsrail ordusu atəşkəsdən bəri ilk dəfə Qəzzanın mərkəzinə genişmiqyaslı quru hücumuna başlayıb
RH
Şahidlərin məlumatına görə, İsrail qüvvələri Muğraka, Səlahəddin prospektindəki Qəzza vadisi körpüsü və Nuseyrat qaçqın düşərgəsinin şimalındakı əd-Davə məhəlləsini əhatə edən ərazilərə qurudan hücum edib. Buldozerlərin də daxil olduğu hərbi texnika şərq istiqamətindən irəliləyərkən ərazi intensiv atəşə və artilleriya zərbələrinə məruz qalıb. Nuseyratdakı əl-Avdə xəstəxanasının tibb mənbələri İsrailə məxsus pilotsuz uçuş aparatının Muğrakaya endirdiyi zərbə nəticəsində bir nəfərin həlak olduğunu, çox sayda sakinin isə yaralandığını bildirib.
Postxronika.az TRT Haber istinadən xəbər verir ki, yerli mətbuat atəşkəs razılaşmasından bəri ordunun Qəzza zolağının mərkəzinə ilk dəfə genişmiqyaslı əməliyyata başladığını təsdiqləyib. Köçkünlərin sığındığı Bureyc və Nuseyrat düşərgələrinin girişləri, Ebu Şəmalə stadionu ətrafı və "Sarı xətt" bölgəsi ağır atəş altında saxlanılıb, əraziyə tanklar yerləşdirilib. Bundan əvvəl dronların yaşayış evlərinə partlayıcı ataraq apardığı dağıntıların isə böyük hücuma hazırlıq məqsədi daşıdığı məlum olub.
Artan bombardmanlar və hərbi texnikanın irəliləyişi qarşısında fələstinli ailələr həyatlarını xilas etmək üçün sığındıqları məntəqələri tərk edərək yenidən köç yollarına düşməyə məcbur qalıblar. Mülki əhalinin sıx məskunlaşdığı mərkəzi bölgələrdə hərbi əməliyyatların bərpası anklavdakı humanitar böhranı daha da ağırlaşdırır. Bölgədə davam edən gərginlik atəşkəs rejiminin taleyini və mülki şəxslərin təhlükəsizliyini ciddi sual altına qoyur.